Gleðileg jól og farsælt komandi ár

Starfsfólk Leikholts óskar börnum og foreldrum þeirra gleðilegra jóla og farsæls komandi árs
með kærri þökk fyrir ljúfar og góðar samverustundir.

Hittumst heil og kát á nýju ári.
(Leikskólinn opnar aftur 2. janúar.)

Jólakveðjur

Börn og starfsfólk Leikholts

 

16. nóvember 2011

Í dag var Dagur íslenskrar tungu haldinn hátíðlegur. Börnin sungu nokkur vel valin lög fyrir gesti.  Við þökkum öllum fyrir komuna og áheyrnina.


Gíraffahópur og Hundahópur að syngja daga og mánaðalagið


Fiðrildahópur flutti 2 lög

26. október 2011

Ágætu foreldrar

Nú er vetur genginn í garð og við þökkum fyrir sumarið. Samt sem áður er veðrið ekki farið að hrella okkur mikið, en það má svosum búast við því hvað úr hverju.

Töluverðar breytingar eru í vændum, nýr starfsmaður og gamall að koma tilbaka. Sirrý hefur störf fyrsta nóvember og tekur við deildarstjórn í Stórholti þar af leiðandi fer Sigríður alfarið yfir í Smáholt. Við höfum einnig ráðið nýjan starfsmann en það er hún Jette Magnea Jónsdóttir og verður hún aðallega í Stórholti en er suma daga í Smáholti líka. Við bjóðum Sirrý og Jette hjartanlega velkomnar!

Ný börn hefja einnig vistun núna í nóvember en það eru þær Sara Björk í Þrándarholti og Kamilla Mist í Brautarholti, síðan byrjar hún Ástríður Sólveig í lok nóvember. Við bjóðum þær einnig hjartanlega velkomnar.

Um áramót er stefnt að því að árgangarnir verði saman í hópum, þ.e. hver hópur er hreinn árgangur. Einnig er stefnt að því að allur 2009 árgangurinn flytjist yfir í Stórholtið um áramót. Nánari tilhögun á því verður send foreldrum.

Síðastliðinn þriðjudag var hér afa og ömmu kaffi. Fjölmargir afar og ömmur komu, horfðu á myndasýningu um leikskólastarfið og drukku kaffi með börnunum. Við þökkum þeim kærlega fyrir innlitið.

Næsti starfsdagur er mánudagurinn 7. nóvember og leikskólinn lokaður allan daginn.

Góðar kveðjur
Vilborg

28. september 2011


Komið þið sæl ágætu foreldrar og forráðamenn.

Hann Sigurjón Tristan á afmæli í dag – við setjum mynd af honum inn á heimasíðuna því það gleymdist að tilgreina hann á dagatal septembermánaðar.

September er búin að vera svo skemmtilegur því börnin hafa verið mikið úti ásamt því að takast á við ný og spennandi verkefni í hópastarfi leikskólans.

Starfsfólk leikskólans stefnir á kynnisferð til heimalands Millu næsta vor. Við komum til með að nýta starfsdaga og Hvítasunnuhelgina í þetta ferðalag og munum við tilkynna ykkur þetta með góðum fyrirvara ... eins munum við eflaust plaga ykkur með fjáröflun í vetur að einhverju tagi.

Næstu mikilvægu dagsetningar eru:
Haustþing leikskólakennara haldið föstudaginn 7. október og er leikskólinn lokaður allan daginn.
11. október verður síðan kynningarfundur leikskólans og eins og síðasta ár heldur foreldrafélagið Leiksteinn aðalfund sinn fyrr um kvöldið. Þetta þótti heppnast vel í fyrra og mæting var góð. Við hvetjum alla til að mæta og stefnir starfsmannahópurinn á að vera með sérstaklega gómsætar og ljúffengnar veitingar í boði gegn hóflegu verði .. við erum sem sagt byrjaðar á fjáröflun

Send hefur verið út auglýsing um starf við leikskólann. Það er enginn starfsmaður að hætta eins og ég hef fengið margar fyrirspurnir um, það hefur legið í loftinu að það þyrfti að fjölga starfsfólki vegna fjölda barngilda og frá 1. nóv – 1. jan bætast við fjögur eins árs börn. Við tökum þessu bara fagnandi og vonandi fáum við einhvern skemmtilegan starfsmann í lið með okkur.

Stefnt er á að malbika planið hér fyrir utan .. kannski orðin gömul tugga, en ég vona að nú sé komið að því. Nákvæm tímasetning verður auglýst.

Góðar kveðjur
Vilborg M. Ástráðsdóttir
Leikskólastj.





2. september 2011

Ágætu foreldrar.

Leikskólastarfsemin er óðum að komast á fullt skrið, það tekur tíma fyrir alla að læra á skipulagið sem fylgir leikskólabatteríinu og þau börn sem hafa verið í aðlögun eru alveg að ,,ná þessu".

Nú fer að líða að því að gott væri að sjá hlýja vettlinga og húfu í fatahólfinu til viðbótar við það sem er nú þegar og við hvetjum þá foreldra sem enn geyma leikskólatöskuna á snaganum að taka fötin úr henni og raða í hólfið. Töskurnar eru svo fyrirferðamiklar og gefist hefur vel að geyma peysur, sokka, vettlinga ofl. þ.h. í hólfinu og hengja útifötin á snagann. Öll hefðbundin aukaföt fara upp á deild á tiltekin stað sem þið þekkið eflaust.

Það eru alltaf smá tilfæringar í starfsmannahópnum. Þangað til Sirrý kemur til baka er dálítið knappt hjá okkur, Steinunn hleypur undir bagga og leysir af inni á deild þegar álagið er mikið, eins eigum við von á að Meike komi aftur í afleysingar í lok september. Það er gott að eiga góða að.

Skaftholtsréttardaginn er leikskólinn lokaður - næsti dagur sem leikskólinn lokar er föstudagurinn 7. október en þá er Haustþing leikskólakennara. Síðan lokar leikskólinn aftur mánudaginn 7. nóvember og er það síðasti starfsdagur fyrir áramót.

Ég vil benda foreldrum á að hægt er að óska eftir niðurfellingu á leikskólagjöldum ef börn eru fjarverandi í samfellda viku, tvær o.s.frv. Margir hafa nýtt sér þetta vegna utanlandsferða, sumarfrí, jól og páska. Bara að muna að sækja um fyrirfram.

Ný Aðalnámskrá leikskóla kom út núna í júní 2011. Það er athyglisvert að lesa hana og ljóst að mikill metnaður hefur verið lagður í vinnuna. Í henni kveður við nýjan tón frá fyrri námskrá, fyrri hluti hennar er sameiginlegur leik-, grunn- og framhaldsskóla og eins og segir í námskránni sjálfri ,,Segja má að aðalnámskrá sé samningur þjóðarinnar við sjálfan sig um menntamál." Lagðir eru til grundvallar sex grunnþættir menntunar: læsi, sjálfbærni, lýðræði og mannréttindi, jafnrétti, heilbrigði og velferð og sköpun. Námssvið leikskóla hafa breyst frá því sem áður var, í: Læsi og samskipti (var áður málörvun), heilbrigði og vellíðan (var áður hreyfing), sjálfbærni og vísindi (var áður náttúra og umhverfi) og sköpun og menning (var áður myndsköpun, menning og samfélag). Námssviðin eru núna færri og yfirgripsmeiri, því er ekki í rauninni hægt að útskýra í einföldu máli hvernig námssviðin breytast því þau skarast, vinna með hvort öðru og nú gerð krafa á að horfa meira á stóra samhengið. Það verður því dágóð vinna fyrir okkur að breyta námskránni okkar í samræmi við þessa nýju aðalnámskrá en virkilega spennandi og krefjandi verkefni.

Kynningarfundur fyrir foreldra hefur ekki enn verið dagsettur en hann er alla jafnan í október. Þar komum við m.a. til með að reyna að útskýra hvernig við ætlum að vinna eftir nýrri aðalnámskrá. Þetta verður bara gaman

Með bestu kveðju
Vilborg M. Ástráðsdóttir
leikskólastjóri